Minder gewig, meer voëltjies.
Miskien moet dit wees, minder gewig, meer arende.
Die oud Middelburger, Aldrich Potgieter, het volgens berigte 18 kilogram afgeskud en nou laat rol hy die voëltjies in.

Twee arende

Nadat dit maar broekskeur gegaan het in die Amerikaanse PGA-reeks het hy die naweek op die laaste rondte van die Genesis Uitnodigings-toernooi twee arende gesink.
Sy rondte het ook twee brouhoue en ’n voëltjie ingesluit.
Hy het ’n -15 op sy telkaart ingevul, net drie houe agter Jacob Bridgeman op -18.
Rory McIlroy het ’n -17 gespeel.
Voor dit het Potgieter in drie toernooie die afsnypunt gemis.

Herwin vorm

Op die plaaslike front het plaaslike prokureur Leon van den Berg se skoonseun, Oliver Bekker, sy ou vorm herwin en die Jonsson Crane Durban Ope gewen, na ’n bestendige 65 68 en 67.
Oud HTS Middelburg leerder, Ruan Korb, het self bestendige gholf gespeel in Durban met rondtes van 70 70 en 72 vir ’n 212. Die aksie skuif nou na Stellenbosch vir die Investec Suid-Afrikaanse Ope vanaf 26 Februarie tot 1 Maart.
Die hoogaangeskrewe Amerikaner, Patrick Reed, het ook vir die toernooi ingeskryf.