Die saak teen ’n bewaarder van Korrektiewe Dienste in Oudtshoorn, wat na bewering sy vrou aangerand het, is in die plaaslike streekhof vir aanhoor voor ’n ander landdros uitgestel.

Volgens Oudtshoorn Courant, staan Roegelin Campher (40) tereg op aanklagte van aanranding met die opset om ernstig te beseer en opsetlike saakbeskadiging.

Die 40-jarige word daarvan beskuldig dat hy sy vrou op 16 Maart 2025 aangerand en haar motor beskadig het.

Borgtog is aanvanklik in die landdroshof aan hom geweier nadat dit aan die lig gekom het dat hy voorheen beskermingsbevele en borgtogvoorwaardes verontagsaam het.

4de voorval in 8 maande

Landdros Stephanie Strydom het tydens sy eerste borgtogaansoek opgemerk dat daar ’n duidelike geskiedenis van geweld in die verhouding bestaan, met die jongste klagte die vierde voorval binne agt maande.

Campher het aangedui dat hy onskuldig op die aanklagte sal pleit.

Tydens ’n tweede borgtogaansoek, wat op nuwe feite berus het, is borgtog van R2 000 aan hom toegestaan, onderhewig aan streng voorwaardes. Sommige van dié voorwaardes is later deur Streeklanddros Daniel Boks verander.

Die saak is tot volgende Vrydag uitgestel.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.