Kwalifiserende plaaslike en internasionale instansies sal nou onder bepaalde voorwaardes met die Landbounavorsingsraad (LNR) kan saamwerk om bek-en-klouseer-entstof op groter skaal te vervaardig, berig die Parys Gazette.

TLU SA het die aankondiging deur die minister van landbou, Willie Aucamp, verwelkom.

Die voorwaardelike lisensiëringsooreenkomste sal die LNR se huidige produksiebeperkings help oorkom en groter hoeveelhede entstof beskikbaar stel.

TLU SA beskou die besluit as ’n belangrike stap in die bekamping van bek-en-klouseer en die beskerming van Suid-Afrika se veebedryf.

Plaaslike en internasionale instansies sal ’n toepaslike lisensiëringsooreenkoms met die LNR moet sluit en steeds aan voorgeskrewe wetenskaplike, regulatoriese, vervaardigings- en gehaltevereistes moet voldoen.

Die produksie van die entstof sal dus steeds binne ’n streng beheerde omgewing plaasvind en deur toepaslik geakkrediteerde en gemagtigde instansies behartig word.

Entstof geskik vir virusstamme in SA

Volgens TLU SA het veeartse en akademici wat saam met die BKS werk, bevestig dat die LNR-entstof besonder geskik is vir die virusstamme wat in Suid-Afrika voorkom.

“Die inligting wat ons van veeartse en akademici ontvang, dui daarop dat dit die geskikste entstof is om die Suid-Afrikaanse stamme aan te spreek en die nodige immuniteit in kuddes te help opbou,” sê Bennie van Zyl, hoofbestuurder van TLU SA.

’n Verdere voordeel is dat die LNR-entstof na verwagting langer immuniteit kan bied as sommige van die entstowwe wat tans ingevoer word.

Volgens TLU SA kan die LNR-entstof immuniteit van tot ’n jaar bied, terwyl sekere ingevoerde entstowwe vir ongeveer drie tot ses maande immuniteit bied.

“Langer immuniteit kan ’n groot voordeel vir die veebedryf wees. Dit kan produsente help om kuddes meer doeltreffend te beskerm en kan ook die praktiese en finansiële las van meer gereelde inenting verminder,” sê Van Zyl.

TLU SA meen groter deelname deur bevoegde vervaardigers kan ook tot meer mededinging, verbeterde beskikbaarheid en moontlik laer koste lei.

Entstofprys sal van verskeie faktore afhang

Die uiteindelike prys van die entstof sal egter afhang van onder meer die lisensievoorwaardes, regulatoriese vereistes, vervaardigingskoste en die kommersiële haalbaarheid van produksie.

Die LNR sal intussen voortgaan om sy eie produksievermoë uit te brei.

Volgens die minister sal enige inkomste uit lisensiëringsooreenkomste geoormerk word om die LNR se interne BKS-entstofvervaardigingskapasiteit verder uit te bou.

Entstof moet gereeld getoets word

TLU SA het ook die besluit verwelkom om verteenwoordigende virus-isolate wat tans in Suid-Afrika sirkuleer, aan die Pirbright Institute in die Verenigde Koninkryk voor te lê vir verdere entstofpassing.

Die doel is om wetenskaplik te bepaal hoe geskik beskikbare plaaslike en ingevoerde entstowwe vir die huidige Suid-Afrikaanse BKS-stamme is.

“Dit is belangrik dat daar voortdurend getoets word of die entstof steeds die stamme wat in Suid-Afrika voorkom, voldoende aanspreek. Virusveranderinge en moontlike mutasies moet betyds geïdentifiseer word om te voorkom dat ’n entstof met verloop van tyd minder doeltreffend raak,” sê Van Zyl.

TLU SA meen die huidige benadering bied ’n meer verantwoordelike en doelgerigte manier om BKS te beheer.

“Ons het groot waardering vir die rigting wat nou ingeslaan word. Indien die lisensiërings- en regulatoriese prosesse verantwoordelik en sonder onnodige vertragings afgehandel word, kan hierdie ontwikkeling ’n baie belangrike bydrae lewer tot die beskerming van Suid-Afrika se veebedryf en die breër landbousektor,” sê Van Zyl.

799 gevalle in Vrystaat

Die Vrystaatse Departement van Landbou het Vrydag (25 September) bevestig dat 799 gevalle van bek-en-klouseer tot dusver in 19 munisipaliteite in die provinsie aangemeld is.

Daarvan is 644 gevalle suksesvol behandel en die kwarantynmaatreëls opgehef.

Daar is gevolglik nog 155 aktiewe gevalle onder kwarantyn, het die departement gesê.

Slegs een nuwe geval is die afgelope week in Fauresmith bevestig.

Volgens die statistieke is die meeste gevalle tot dusver in die Moqhaka-munisipaliteit bevestig.

Die Heilbron-veeartsenykundige gebied, waaronder Ngwathe val, het altesaam 97 bevestigde gevalle gehad, terwyl 64 gevalle in die Sasolburg-gebied bevestig is.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.