Vier mans sal vandag in ‘n hof in Cradock verskyn nadat hulle in hegtenis geneem is in verband met ‘n gewapende roof wat gister by ‘n spazawinkel in Cradock plaasgevind het.

Volgens Graaff-Reinet Advertiser het die bestuurder van CDK Sekuriteit, Ivan Stock, gesê die inhegtenisname is die gevolg van ‘n gesamentlike operasie tussen CDK Sekuriteit, Nxuba K9, die Nxuba Pops-eenheid, die Cookhouse SAPD-snelwegpatrollie, Paterson SAPD Vispol-lede, asook lede van die Nasionale Landelike Veiligheidsgroep.

Tydens die roof, wat in die vroeëoggendure van gister plaasgevind het, is geld en goedere uit die winkel geneem. Daar is met die eienaar se voertuig gevlug.

Hierdie voertuig is teen 10:30 verlate op die N10 gevind.

CDK Sekuriteit is kort ná die roof in kennis gestel en die onderskeie afdelings van die polisie is gemobiliseer om inligting op te volg.

Kunsmatige intelligensie-hulpbronne is ingespan om die verdagtes op te spoor. ‘n Silwer Volkswagen Polo, wat glo gebruik is om verder te vlug nadat die wegkomvoertuig verlaat is, is later die middag by die Paterson en Addo-kruising op die N10/R342 geïdentifiseer en onderskep.

Die verdagtes is in hegtenis geneem en die Polo, asook wapens wat in die Polo gevind is, is gekonfiskeer.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.