‘n Vrystaatse boer wat na bewering ’n jong man geskiet het, het gister in die hof verskyn. Die 82-jarige boer van Ladybrand is Sondag op twee aanklagte van poging tot moord in hegtenis geneem. Daar is ook beslag gelê op die verdagte se vuurwapen.

Na bewering het ‘n 18-jarige man en sy 19-jarige vriend van ’n ander plaas in die distrik Vrydag omstreeks 20:30 op die plaas gejag toe hulle deur die verdagte gekonfronteer is, sê polisiewoordvoerder Mmako Mophiring.

“Die boer het hulle glo gevloek waarna hulle met hul motor weggejaag het. Die boer het hulle egter agternagesit en op hulle begin skiet. Die 18-jarige wat bestuur het, is in die rug en skouer geskiet,” sê Mophiring. Die vriend het verder bestuur en na hulle plaas gery waar die man se oom met hom na ’n hospitaal in Bloemfontein gejaag het.

Dié saak se uitkoms was nie teen tye van publikasie bekend nie.

Soortgelyke voorval

In April is ‘n 35-jarige man doodgeskiet nadat hy glo onwettig op Joseph Jan Shabango (48), ’n boer van Bethal in Mpumalanga, se plaas gejag het.

Verskeie skote is afgevuur en die man is op die toneel dood verklaar. Die vuurwapen wat in die skietery gebruik is, is in die boer se besit gevind. Drie patroondoppies is op die toneel gekry.

Shabango het hom ná die skietery aan die polisie oorgegee nadat ’n vriend van die oorledene ongedeerd van die toneel gevlug het. Die verdagte is op borgtog van R10 000 vrygelaat. Die saak is uitgestel vir verdere ondersoek.

Lees die oorspronklike berig op OFM Nuus.