Om op 103-jarige ouderdom steeds jou ID-nommer uit jou kop te ken en elke maand maklik tien grootdrukboeke deur te lees, is ’n uitsonderlike prestasie – iets wat nie sommer deur elke Jan Rap en sy maat nagedoen kan word nie, berig Mossel Bay Advertiser.

Dié merkwaardige eienskappe is kenmerkend van Helena Steyn se kleurryke menswees.

Steyn, ’n inwoner van die Groenkloof-aftree-oord in Groot-Brakrivier in die Wes-Kaap, het Vrydag (26 Junie) dié spesiale mylpaal saam met haar dogter, Kia Bierman, gevier.

Kliek hier om na die video te kyk waar die personeel van die aftree-oord vir haar sing.

Later die middag het sy nog energie gehad om verder saam met haar seun Elbert, ’n afgetrede mediese dokter en sy gesin, aan varkribbetjies by ’n restaurant in Glentana te smul.

Steyn het op ’n plaas in Middelburg, in die destydse ou-Transvaal (nou Mpumalanga), grootgeword en ’n perdekar het haar daagliks skool toe vervoer.

Ná matriek het sy by die staatsdiens aangesluit en by die poskantoor, eers as assistent en later as klerk, gewerk. Dit is ook waar sy haar man, Jan, ’n finansiële beampte, ontmoet het.

Die egpaar is geseënd met vier kinders: Kia, ’n afgetrede onderwyseres , Jan, wat ook ’n mediese dokter is en Tertius, wat al oorlede is.

Die gesin het op verskeie plekke in die land gewoon, onder meer in George gedurende 1955 en 1956, voordat hulle na Orkney in die Noordwes-provinsie verhuis. Dit was hul tuiste vir langer as 4 dekades.

Steyn en haar dogter het net voor haar 100ste verjaarsdag, na Groot-Brakrivier  verhuis – ’n besluit waaroor sy nie spyt was nie.

Steyn glo haar goeie gesondheid en helder verstand is slegs genade. “Die ore wil nie altyd saamwerk nie,” skerts sy.

Volgens Kia is haar ma ’n besonder realistiese persoon. Haar gesin was nog altyd haar eerste prioriteit en met haar innemende persoonlikheid het sy maklik mense aangetrek.

Sy beskryf haar as positief en nederig. “My ma sien altyd die glas vol as halfvol,” sê Kia.

Steyn sê sy het alles gedoen wat sy in die lewe wou doen. “Ek het ’n kosbare en vervulde lewe gehad. Ons het nie altyd geld gehad om met vakansie te gaan nie, maar wat ons gesien het, het ons daarvan gehou om dinge saam te doen en by warmwaterbronne te kuier. Ná Jan se dood het ek saam met die kinders in Namibië en oorsee rondgerits. As die wiel gedraai het, het ek ingeklim. Ek is tevrede,” sê sy.

Nou kan sy as die ‘bus verbykom, daarop klim,’ sê sy.

Kia verduidelik dat dit hulle spesiale sê-ding is: “Dit beteken maar net dat ons vrede het en gereed is om, wanneer die tyd aanbreek, die tydelike met die ewige te verwissel.”

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.