Volgens die departement se woordvoerder, Steve Mabona, is die departement diep bekommerd oor die aantygings.

“Senior amptenare is na die skool ontbied om die feite rondom die aantygings te ondersoek. Ons moet klem lê daarop dat die personeellede nie geskors is nie. Hulle is bloot herontplooi terwyl die ondersoek voltooi word.”

Mabona het bygevoeg dat die departement se psigo-sosiale eenheid ook na die skool ontplooi is om diegene wat deur die beweerde insidente geraak is, by te staan.

“Die departement veroordeel enige vorm van wangedrag of rassisme en sal nie skroom om op te tree indien die aantygings waar bewys word nie. Terselfdertyd vra ons leerders om saam met ons te werk om die situasie te ontlont en die ondersoek kans te gee om sonder inmenging sy gang te gaan.

“Ons doen ‘n beroep op onderwysers om hulle nie skuldig te maak aan wangedrag nie, om op onderrig en leer te fokus, en deur voorbeeld te lei.”

Die Record wag nog vir die beheerliggaam se terugvoer.

Volgens ’n anonieme bron by die skool is die aantygings teen die onderwysers en die hoof ongegrond en spruit dit bloot uit normale dissiplinêre aksie wat toegepas is.

Die betrokke leerder is glo oor afwesigheid, laatkom en aanhoudende swak gedrag aangespreek. Die leerder se ma is volgens die skool se normale prosesse genader, waarna sy die onderwysers onder andere deur selfoonboodskappe begin dreig het.

Die ouer het glo tydens ’n vergadering op 4 Augustus een van die onderwysers aangerand en kort daarna die aantygings van rassisme gemaak.