Tydens die Marinemaand-viering by die Dias-museum het PhD-kandidaat Stephanie Nicolaides ‘n uiters insiggewende aanbieding oor mikroplastiekbesoedeling gelewer.

Mikroplastiek is plastiekpartikels van tussen 5mm en 0.01 µm (mikrometer).

Volgens Mossel Bay Advertiser is Nicolaides ‘n kandidaat in bewaringsbiologie aan die Universiteit van die Wes-Kaap, en haar navorsing fokus op plastiekbesoedeling en die invloed daarvan op marinebiodiversiteit.

Haar studie fokus op die Mosselbaai-kuslyn, waar sy die teenwoordigheid van plastiek ondersoek, plaaslike kennis versamel en volhoubare oplossings ontwikkel.

Sy het oor ‘n tydperk van ‘n paar maande sediment op 10 van Mosselbaai se strande gebruik om die diepte en verspreiding van mikroplastiek te meet.

Sy het ook seewatermonsters versamel, gesif en gefiltreer om plastiekdeeltjies te isoleer, en het sekere organismes wat ‘help om die plastiekstorie te vertel’ geanaliseer – dit sluit sekere mossels, slakke en sardientjies in.

Mikroplastiekbesoedeling

Nicolaides se passie vir haar navorsing is duidelik en haar aanbieding het waardevolle insigte bevat oor wat plastiekbesoedeling is, hoe dit ons raak en wat die toekoms vir Mosselbaai en Suid-Afrika binne daardie konteks inhou.

Sy het drie voorleggings by die Dias-museum aangebied waartydens Mosselbaaiers die kans gehad het om meer oor haar navorsing en bevindings te wete te kom.

Gedurende die voorlegging het sy ‘n kort geskiedenis van plastiek gegee. Sy sê sedert die ontstaan daarvan is daar al 9.2 miljard ton geproduseer, waarvan net sowat 30% hergebruik word. Die res beland as primêre plastiekafval in die omgewing.

Die bronne van mikroplastiekbesoedeling is tweeledig, verduidelik sy. Primêr is dit mikrokorrels in kosmetiese produkte en industriële skuurmiddels; sekondêr is dit groter plastiekitems soos sakke en bottels wat oor tyd afbreek.

Hierdie bronne dra by tot die teenwoordigheid van mikroplastiek in oseane, riviere en selfs die lug wat ons inasem. Dit kan marinelewe skade aandoen, die voedselketting betree, en hou risiko’s vir menslike gesondheid en ekosisteme in, sê Nicolaides.

Suid-Afrika se kuslyn strek oor meer as 3 000km en verbind twee groot oseane. Nicolaides sê Mosselbaai se hawe ondersteun beide kommersiële vlote en kleinskaalse visserye, iets wat plaaslike lewensbestaan met die land se nasionale seekosvoorsieningsketting verbind.

Kontaminasie deur mikroplastiek plaas net nóg druk op dié industrie wat reeds dalings in voorraad, oorbevissing en omgewingsverandering in die gesig staar.

Die toerismebedryf is ook afhanklik van gesonde oseane.

Wat kan ons doen?

Ná die nodige agtergrond en die prentjie van die realiteit wat sy geskets het, het Nicolaides egter ook voorstelle gemaak vir wat op plaaslike vlak gedoen kan word.

• By die huis: Hergebruik bottels en sakke en sorteer jou huishoudelike afval vir herwinning.
• Aan die kus: Neem deel aan strandskoonmaakdae. Wanneer jy gaan stap, bring ‘n sak saam en tel gemors op. Rapporteer vislyne, nette of groot afval. Kontak die Mossebaai-munisipaliteit by 044 606 5000 om afval te rapporteer.
• In die gemeenskap: Ondersteun plaaslike inisiatiewe en bewareas.  

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.