Twee beweerde perlemoenstropers is tussen gisteraand en vanoggend in hegtenis geneem ná sowat 174 perlemoen gekonfiskeer is.

Die arrestasie volg ná sowat 30 stropers opgemerk is in ‘n operasie wat tydens volmaan langs die kus geloods is.

‘n Taakspan, bestaande uit die Jeffreysbaai-polisie, die departement van seevisserye, Kouga-munisipaliteit se wetstoepassingseenheid, die veediefstaleenheid en Paradysstrand-buurtwag, is geaktivieer.

Tydens die operasie is lede van Kouga se perlemoen-taakspan, bygestaan deur National Vehicle Information Cloud (Navic) en ‘n ondersoek geloods in die gebiede waar perlemoenstropery voorkom. Tydens volmaan is daar gewoonlik meer aktiwiteit.

Lede van die departement van seevisserye was gereed met ‘n rubberboot om stropers in  diepsee te verras.

‘n Hoë sigbaarheidsbenadering is aanvanklik gebruik om verdagte voertuie wat deur die gebied beweeg, te monitor.

Volgens Jeffreysbaai-polisie se kaptein Dominique Doubell van die Sigbare Polisiëringseenheid (Vispol), is daar tydens die ondersoek sowat 30 stropers opgemerk, en seevisserye kon inbeweeg en twee stropers is suksesvol in hegtenis geneem.