Saterdagoggend het ongeveer 14 vroue vroeg gereedgestaan vir ’n selfverdedigingsklas wat deur AfriForum se Vryheid-tak aangebied is.

Praktiese vaardighede vir Vrouemaand

Die klas is gereël as deel van Vrouemaand. AfriForum Vryheid se nuwe voorsitter, Linda de Jager, het met die idee vorendag gekom om ’n selfverdedigingsklas vir plaaslike vroue beskikbaar te stel.

De Jager het verduidelik dat die doel van die klas was om vroue toe te rus met praktiese kennis en vaardighede wat hulle kan gebruik indien hulle hulself in ’n gevaarlike situasie bevind.

“Ons as vrouens is weerloos en moet leer om onsself te beskerm,” het De Jager gesê.

Fokus op verdediging tydens ’n aanval

Volgens haar was die fokus van die klas spesifiek op hoe ’n vrou haarself tydens ’n aanval kan verdedig. Aandag is ook gegee aan ’n situasie waarin ’n vrou met die gevaar van verkragting gekonfronteer word.

Die praktiese sessie is aangebied deur Brazilian Jiu Jitsu-instrukteur Chris Venter, met Adele en Carrol as assistente.

Vroue leer tegnieke om hulself te beskerm

Die vroue het aan die klas deelgeneem en praktiese tegnieke aangeleer wat daarop gemik is om hulself tydens ’n aanval te beskerm en ’n geleentheid te skep om uit ’n gevaarlike situasie te ontsnap.

Vir De Jager was die geleentheid ’n manier om Vrouemaand op ’n praktiese en betekenisvolle wyse te vier. Die fokus was nie net op die viering van vroue nie, maar ook op die belangrikheid daarvan dat vroue oor die nodige kennis beskik om hulself te kan beskerm.

The news provided to you in this link comes to you from the editorial staff of the Vryheid Herald, a sold newspaper distributed in the Vryheid area.