Die brawe optrede en  toewyding van lede van die polisie se reddingspan wat Donderdag vasgekeerde plaaswerkers en hul families tydens ‘n urelange en kritieke reddingsaksie  uit vloedwater  na veiligheid gebring het, is wyd geloof. Die plaaswerkers is by twee afsonderlike punte in hul huise vasgekeer toe die Koppies dam begin oorloop het.

Sers. Mahlomela Kareli sê polisieduikers is om 12:00 na die dam nadat die noodroep van die vasgekeerde werkers ontvang is. ‘n Man is by ‘n tydelike struktuur wat onder water was gered, waarna nog tien mense onder wie ook kinders van onderskeidelik drie en vier maande oud, en ‘n bejaarde man uit ‘n oorstroomde plaashuis gered is. Al die vasgekeerdes was van dieselfde plaas.

Die reddingspan wat bestaan het uit a.o. Hollie Holtzhausen, sers. Arno Cronje, sers. Sweli Simamane, knst. Jaja Molefe en knst Monica Delport, het onverpoosd tot ongeveer 22:00 die aand gewerk om die gestrande werkers wat in lewensgevaar was na veiligheid te bring. Hulle is bygestaan deur ‘n plaaslike inwoner, mnr. Zitzke, wat sy trekker beskikbaar gestel het om te help.

Kareli sê die gekoördineerde optrede het die sukses van die reddingsoperasie verseker.
Die Vrystaatse provinsiale polisie kommissaris, luitenant-generaal Gaile Motswenyane het die vinnige reaksie van die span en uitstaande toewyding van a.o Holtzhausen, sers. Cronje, sers. Simamane, knst Molefe en knst Delport geloof. “Hul brawe en professionele optrede in ‘n uiters gevaarlike situasie het sonder twyfel mense lewens gered,” het Motswenyane gesê.

Die Vrystaatse polisie het ook sy opregte dank betuig aan mnr. Zitzke vir sy onbaatsugtige hulp tydens die kritieke reddingsoperasie. Dit het weer bewys watter groot bydrae gemeenskappe lewer in tyd van nood, is gesê.