Motorfietsryers van Gauteng is die afgelope naweek op Vryheidsdag 27 April in Parys verwelkom vir hul Cancervive-rit waarmee die fokus geplaas is om die boodskap te versprei dat vroeë opsporing van kanker lewens kan red.

Daar is by die Eiffel Waffle House gestop waar ‘n heerlike ontbytbederf op die groep gewag het.

Cancervive het oor die afgelope 14 jaar 612 319 Suid-Afrikaners bereik met bewusmaking oor kanker.  Hul betrokkenheid by gemeenskappe het hulle oor meer as 30 000 kilometers in al nege die land se provinsies geneem.

Cancervive is ‘n Suid-Afrikaanse nie-winsgewende orgamisasie wat daartoe verbind is om uit te reik na gemeenskappe met opvoeding en bewusmaking oor kanker veral waar inligting nie altyd geredelik beskikbaar is nie.

Die organisasie het ‘n oorwin-gedrewe uitkyk waarmee gepoog word om mites en stigmas rondom kanker aan te spreek deur die inligting wat versprei word. Dit sluit ook in inligting rondom ondersteuning vir kankerlyers.

Die groep ondersteuners van wie sommige self ook kankeroorwinnaars is, is verenig in hul passie vir kankerbewusmaking maar ook hul liefde vir motorfietse. Waar hul kom trek die motorfietse aandag, en begin die groot werk dan om met mense te gesels oor die belangrikheid van vroeë opsporing van kanker. Hul persoonlike ervarings wat hulle deel, dra ‘n  kragtige boodskap oor.

Foto erkenning: Michele Cilliers.