Die Bronkhorstspruit-landdroshof het borgtog toegestaan aan twee leerders van die Lesedi Sekondêre Skool wat aangekla word van moord.

Mlehalinye Montasi (20), ’n graad 12-leerder, is borg van R6 000 toegestaan, terwyl Kgotlhello Mathabathe (19), ’n graad 10-leerder, borg van R3 000 gekry het. Die twee word daarvan beskuldig dat hulle op 17 Junie ‘n graad 10-leerder,  Lethabo Mokonyane aangerand en doodgesteek het.

Na bewering is Mokonyane ná die eksamensessie deur die beskuldigdes naby die skoolhek gekonfronteer. ’n Geveg het ontstaan waartydens een van die beskuldigdes hom glo vasgekeer het terwyl die ander hom herhaaldelik met ’n skerp voorwerp gesteek het. Mokonyane is na die hospitaal gehaas, maar het ’n paar uur later aan sy beserings beswyk.

In die hof het die beskuldigdes borg gevra sodat hulle hul skoolloopbaan kan voortsit. Die aanklaer, Karabo Sebela, het borg teëgestaan en aangevoer dat Montasi onwettig in die land is en ’n vlugrisiko inhou. Sy het ook gesê dat albei beskuldigdes aan die getuies bekend is en moontlik kan inmeng.

Die landdros het egter borg toegestaan, onder streng voorwaardes dat die beskuldigdes hofverrigtinge moet bywoon totdat die saak afgehandel is, nie met getuies mag inmeng nie, en hulself aan korrektiewe toesig moet onderwerp.

Die saak is uitgestel tot 10 Oktober wanneer die saak in die streekhof sal voorkom.