Haar lag was aansteeklik en haar hart oop vir mense. So sal die gemeenskap van Parys Tilla Odendaal onthou wat Maandagaand in die Eugene Marais-hospitaal oorlede is. Sy was 62.

Tilla is vroeër vanjaar met kanker gediagnoseer en het die afgelope maande ‘n pad met haar gesondheid geloop. Sy is enkele dae ná haar verjaardag op 11 Augustus in die hospitaal opgeneem en was haar toestand kritiek.

Tilla het vir die afgelope meer as 20 jaar diep spore in Parys gelaat nie net as knap sakevrou nie, maar ook met haar betrokkenheid in die gemeenskap. Sy was eienaar van Parys Matte en Franchise-eienaar van Top Carpets & Flooring, asook mede-eienaar van die Impaksentrum. As Rotariërlid  het sy haar plek volgestaan en vreugde gevind in die jare wat sy deel was van die Deo Gloria-koor. In die Parys-0os gemeente het sy haar talente uitgeleef met haar betrokkenheid.

As direkteur van Parys Info & Tourism, was die dorp en sy gemeenskap vir haar belangrik.

Sy het maklik kon lag, maklik kon gee en soos haar liefde vir helder kleure, sonskyn gebring in haar vriendekring en haar gesin met wie sy haar lewenspad gestap het, en die mooiste memories gemaak het.

Tilla sal met net die mooiste herinneringe onthou word deur haar dogter, Suré, skoonseun, Juan, kleinkinders Jana en Anro, en haar vriendekring.