Ietermagog uit gereedskapkis gered
Die verdagtes was met die ietermagog op pad na 'n potensiële koper.
Vinnige optrede van die polisie het gister tot die redding van ‘n ietermagog gekom wat in die besit van twee verdagtes gekry is.
Blitspatrollie lede, vergesel van die polisie se K9-eenheid in Bloemfontein en die Navalsig Misdaadvoorkomingseenheid het ‘n bruin Toyota Corolla sedan op die N8-hoofweg naby ’n vulstasie buite Bloemfontein afgetrek en deursoek waarop ‘n staal gereedskapskis in die motor se kattebak gekry is. Die gereedskapkis was gesluit met ‘n hangslot.
Die twee insittendes van die voeruig het beweer dat hulle nie die sleutel het om die slot oop te maak nie, wat agterdog laat ontstaan het. Toe die gereedskapkis oopgebreek is, is afgekom op die ietermagog.
Die verdagtes is ondervra en het aan die polisie gesê dat hulle van Petrusberg afkomstig is en ’n ontmoeting met die potensiële koper by ’n onbekende plek sou hê. Die waarde van die soogdier word op R104 000.00 geskat.
Klagte vir die Onwettige Besit van ’n wilde Lewende Dier, ingevolge die Nasionale Omgewingsbestuur-Biodiversiteitswet 10 van 2004, is by die Navalsig-polisiekantoor geopen.
Die verdagtes, onderskeidelik 31 en 38 jaar oud, is in hegtenis geneem en sal in die Bloemfontein-landdroshof verskyn, het luitenant-kolonel Thabo Covane gesê.
