Status quo sal vandag by Vaaldam gehandhaaf word waar drie sluishekke tans oop is. Daar is egter ‘n moontlikheid dat addisionele sluishekke dalk môre oopgemaak kan word, en word die situasie deurentyd gemonitor met wydverspreide reën wat vir die week voorspel is.

Vaaldam het vanoggend op 101,86% gestaan met invloei gemeet teen 873 kubieke meter per sekonde, en uitvloei teen 346 kubieke meter per sekonde.

Barrage het vanoggend water uitgelaat teen 480,6 kubieke meter per sekonde.

Donderstorms vir die Vrystaat voorspel

Ná swaar reën wat reeds oor die naweek in die Vrystaat geval het, het die Suid-Afrikaanse Weerdiens gewaarsku dat nog donderstorms vir die res van die week verwag kan word wat tot oorstromings kan lei. Daar is ook gewaarsku teen hael en winderige toestande.

In droeër dele van die provinsie is gewaarsku dat wind kan lei tot die ontstaan van wegholveldbrande.

‘n Kleinerige tornado is gistermiddag buite Heilbron gesien en bevestig deur die Suid-Afrikaanse Weerdiens, maar is geen skade gerapporteer nie.