Die TLU SA Jongboerkonferensie het weer bewys waarom jong boere ’n kernprioriteit in die organisasie se strategie bly. Die byeenkoms het nie net gefokus op die deel van kennis en netwerk nie, maar ook op strukturele versterking, regsrealiteite en praktiese oplossings vir die uitdagings wat jong produsente daagliks in die gesig staar.

Die konferensie het vanjaar by Gecko Ridge in Pretoria plaasgevind.

Volgens Clemens Senekal, voorsitter van die TLU SA Jongboerkomitee, is die doel van die konferensie om jong boere te help om hul rol binne die breër landboubedryf te verstaan en met selfvertroue hul plek in die sektor in te neem. Hy het beklemtoon dat jong boere nie net die toekoms is nie, maar reeds vandag aktiewe rolspelers in landbou se groei en volhoubaarheid is.

Een van vele hoogtepunte van die dag was die onverwagte toespraak deur minister van korrektiewe dienste, dr. Pieter Groenewald, wat jong boere toegespreek het oor kernkwessies wat landbou raak en hul volharding in uitdagende omstandighede beklemtoon het.

Ander programhoogtepunte het insigte oor landboustrukture, die reg en realiteit in landbou, die waarde van die Jongboer-kompetisie, tegnologie en vaardigheidsontwikkeling ingesluit, met bydraes deur Clemens Senekal, dominee Leon Lubbe, Tiaan Barkhuizen, advokaat. Charles Lloyd, Wian Süllwald, Chantelle Potgieter, Willem van der Merwe, Francois du Toit, Shaun Welmans, Kabous van Schalkwyk en Daandré Coetzee.

Die konferensie het ook ruimte geskep vir strategiese gesprekke oor landboustrukture, wetlike realiteite, vaardigheidsontwikkeling en toekomstige projekte. Hierdie temas is hanteer in ’n samewerkende gees, met insette wat daarop gemik is om jong boere prakties toe te rus vir volhoubare ondernemingsbestuur en langtermyn-sukses.

‘n Nuwe Jongboerkomitee is aangekondig, wat die volgende fase van jongboer-aktiwiteite sal lei en die mandaat het om voort te bou op die bestaande werk, met die fokus op deelname, ontwikkeling en samewerking binne die landbousektor.

Clemens Senekal is herverkies as voorsitter van die jongboerkomitee en Wian Süllwald as ondervoorsitter.