Burgersdorp (rugby) en Fochville 1 (netbal) het na afloop van ‘n baie suksesvolle Parys Hoërskool Alumni Namgola Sportweek, die trofeë as wenspanne vir die week huis toe gevat.

By die 600 rugby- en netbalspelers het aan die week deelgeneem, en is in totaal 35 rugbywedstryde en 27 netbalwedstryde gespeel.

Anders as verlede jaar het die weer saamgespeel en is skolesport op sy beste gesien.

Parys se netbalspanne het vyf van hul ses wedstryde gewen, maar het Fochville 1 as wenners uitgestaan, met die span se Jessica Pretorius wat as Speler van die Week aangewys is.

Die sportweek is ‘n jaarlikse tradisie vir Hoërskool Parys, en ‘n groot ekonomiese inspuiting vir die dorp wat benewens die aksie op die sportveld, ook geleentheid gebied het vir die 517 rugbyseuns en 85 netbaldogters om deel te neem aan aktiwiteite soos witwaterroei.

Spanafrigters kon die dorp verken, en Parys se spog gholfbane geniet.