Die Suid-Afrikaanse Weerdiens (SAWD) sê ‘n oppervlak-hoëdrukstelsel sal na verwagting die sentrale en oostelike dele van die land oorheers, terwyl ‘n kouefront na verwagting Donderdag suid van die land sal verbybeweeg.

“Daar is ‘n geringe kans vir geïsoleerde reën en buie wat Donderdag oor die suidelike dele van Gauteng verwag word, asook langs die oos- en suidkus vanaf Donderdag tot Saterdag. Buiten dit word mooi, maar koue tot koel weerstoestande vir die res van die week verwag,” het die Weerdiens gesê.

Vir Dinsdag word mooi weer oor die suidwestelike dele van die land verwag. Elders sal dit gedeeltelik bewolk en warm tot koel wees.

Die weerdiens het mense ook weer aangemoedig om amptelike voorspellings en waarskuwings van die SAWD deurlopend dop te hou, en versigtig te wees vir ongemagtigde of ongeverifieerde inligtingsbronne.