Die materiaal waarvoor gewag is vir herstelwerk aan die R59 aan weerskante van die N1-oorbrug is ontvang, en het ‘n span van die Departement van Gemeenskapsveiligheid, Paaie en Vervoer in die Fezile Dabi-distrik alreeds vandag begin met die vul van slaggate op dié besige roete.

Volgens die Department se hoof paaie superintendent in die distrik, mnr. James Nkabinde, werk die span vandag aan die gedeelte by die R57-brug by Sasolburg, asook by Taaibosspruit waarna daar teruggewerk sal word in die rigting van Parys.

Hoewel noodherstelwerk op dié gedeelte van die R59 ‘n prioriteit van die departement is, kon herstelwerk nie vroeër gedoen word nie, weens ‘n oponthoud met die verkryging van die materiaal, maar is daar verlede week reeds aangedui dat herstelwerk die week gedoen sal word.

Motoriste word gevra om asseblief spoed te verminder en waaksaam te wees waar die span besig is met herstelwerk.