‘n Onbekende bedrag geld is Dinsdag 22 September in ‘n gewapende transito-roof in Sasolburg gebuit wat uiteindelik gelei het tot ‘n kaping en skietery.

Volgens Valke-woordvoeerder adjudant-offisier Fikiswa Matoti, was sekuriteitswagte die oggend besig met normale kontantinvorderings by kleinsakeondernemings in Sasolburg, toe ’n onbekende man een van die wagte genader het en ’n vuurwapen op hom gerig het.

Die geld is toe gevat en het ongeveer vyf verdagtes in ’n blou Nissan Tiida, met registrasienommer CY28TPGP, van die toneel gevlug.

Die sekuriteitswagte het die verdagtes tot in Minaarstraat in Vaalpark agtervolg. Die verdagtes het die Nissan daar gelos en toe ’n Amarax Quantum-minibus, met registrasienommer MD45GVGP, gekaap. Hulle het die bestuurder van die voertuig met hulle saamgeneem en in die rigting van die Vereenigingse taxi-staanplek gery. Daar het hulle die minibus agtergelaat en op ‘n taxi geklim wat na Vosloorus onderweg was.

Tydens ‘n skietery wat daarna sou volg, is twee voertuie in die omgewing en verskeie geboumure beskadig. Niemand is in die voorval beseer of noodlottig gewond nie.

Daar word nou gesoek na Mothoezane Xaba vir ondervraging. Hy is vermoedelik van KwaZulu-Natal afkomstig en kan moontlik die polisie behulpsaam wees in die ondersoek na die transito-roof en kaping.

Enigiemand wat weet waar Xaba hom bevind, word versoek om speurkaptein Chris Mochesane by 071 481 2546 te kontak. Inligting kan ook anoniem by Crime Stop op 08600 10111 of deur die MySAPS-toepassing deurgegee word.