Vliegtuie is ontwerp om hoog bo die wolke te kan vlieg. Voëls is “ontwerp” om ook te kan vlieg. Swaeltjies kan verstommende afstande aflê. Sover soos 6000km.
Op ‘n plaas in die Kestell-distrik het ‘n woonkamerdeur oopgestaan na buite. ‘n Swaeltjie het ingevlieg en eers gesirkel soos vliegtuie dit doen. As daar gratis vervoer is, waarom nie daarvan gebruik maak nie?
Hierdie sonderlinge swaeltjie kies ‘n ongewone landingsplek..op die skouer van ‘n kruipende 11-maande oue seuntjie. Ezra Odendaal is van Bethlehem en kuier by sy ouma op die plaas, Heuninglaagte. Daar is deurentyd beweging van honde en mense rondom hierdie buitengewone gebeurtenis. Al skommelende ry swaeltjie saam.
Daar is geen aanduiding dat hy van plan is om te vertrek nie. Ezra se afstandskatting is glad nie sleg nie, hy gryp-gryp na die hinderlikheid op sy een skouer en kry die punt van die swaeltjie se vlerk beet. Sy greep was te swak en die voëltjie skuif homself weer reg.
Is daar ‘n verklaring hiervoor? Na my mening hoef daar nie navorsing gedoen te word oor hierdie seldsame gebeurtenis nie. Die misterie is voldoende vergoeding.
