Twee ietermagogs uit misdadigers se hande gered
Die vier beskuldigde het reeds voor ide hof verskyn.
Twee ietermagogs is Woensdag 4 November gered nadat hulle in ‘n voertuig by die Waterfall Mall in Rustenburg gevind is.
Lede van die Rustenburgse Plaaslike Misdaadtoneelrekordsentrum (LCRC) en die Departement van Bosbou, Visserye en die Omgewing is na die toneel ontbied waar vier verdagtes in hegtenis geneem is vir die onwettige besit van bedreigde spesies.
Die geraamde waarde van die twee ietermagogs beloop ongeveer R1 miljoen.
Sersant Kelebogile Morake sê verdere ondersoek is aan die gang om die verdagtes se moontlike kriminele netwerk bloot te lê.
Die vier verdagtes het Vrydag, 6 November in die Rustenburgse Landdroshof verskyn op aanklagte van die onwettige besit van bedreigde spesies, ingevolge die Nasionale Wet op Omgewingsbestuur: Biodiversiteit (Wet 10 van 2004).
Die provinsiale polisiekommissaris, luitenant-generaal Arthur Peter Adams, het al die betrokke eenhede geloof vir hul uitstekende samewerking en vinnige optrede wat tot die redding van die ietermagogs en die inhegtenisneming van die verdagtes gelei het.
Hy het beklemtoon dat die SAPD daartoe verbind bly om die land se bedreigde spesies te beskerm en almal wat by wildmisdaad betrokke is, voor die gereg te bring.
