‘n Vragmotor wat ‘n vrag mielies vervoer het, het Vrydag, 12 Mei net voor middernag in die water wat steeds oor die R59 tussen Viljoenskroon en Bothaville (by die Viljoenskroon silo’s) oor die pad stroom, beland en omgeslaan.

Die vragmotorbestuuder kon egter betyds op die dak van die vragmotor se kajuit klim, en is met ‘n kano uit die water gehaal. Daar is Saterdagoggend nog vir ure gesukkel om die vragmotor uit die water te kry.

Mense wat die Oesdagplaas buite Bothaville vir Nampo wil besoek, moet asseblief op die padtekens let waar aangedui word dat alternatiewe roetes gebruik moet word, aangesien die R59 tussen Viljoenskroon en Bothaville waar die water oor die pad stroom, steeds vir verkeer gesluit is.