Volgens Werner Vermaak, woordevoerder van ER24, is nooddienspersoneel net voor 14:00 na die toneel ontbied. Die vier voertuie was oor die pad versprei. ‘n Man is naby een van die voertuie gevind, maar hy het reeds aan sy beserings beswyk met hul aankoms.

‘n Ander man was vasgekeer in een van die wrakke. Nooddienspersoneel kon hom uit die wrak bevry, maar het kort daarna op die toneel aan sy beserings beswyk.

Vyf ander mense is op die toneel vir hul beserings behandel en na die hospitaal geneem. Vier ander mense wat ligte beserings opgedoen het wou nie hospitaal toe geneem word nie.

Die oorsaak van die ongeluk word ondersoek.