Lede van die gemeenskap in Skierlik, Brits, het Sondag (26 Augustus) ‘n vermeende krimineel aan die brand gesteek. 

Volgens kol. Adèle Myburgh, polisiewoordvoerder, het die polisie verdagte in hegtenis geneem op aanklag van aanranding. Dit nadat hy glo ‘n 22-jarige man aangerand het.  Hy is vir sy eie veiligheid in ‘n polisievoertuig gehou nadat lede van die gemeenskap hom reeds aangerand het. 

Volgens haar het ongeveer 300 inwoners geëis dat die polisie die verdagte aan die gemeenskap oorhandig.  Toe die polisie nie die verdagte wou oorhandig nie, het die inwoners parrafien oor die voertuig begin gooi. 

Hulle het die polisiebeamptes begin aanrand en met klippe gestook. Die inwoners het daarin geslaag om die verdagte uit die voertuig te kry waarna hy aangerand en aan die brand gesteek is. Nadat versterkings opgedaag het om die situasie te stabiliseer is daar vasgestel  dat die verdagte dood is. Die verdagte se slagoffer is ook later in die hospitaal oorlede. 

Die provinsiale kommissaris , lt. gen. Baile Motswenyane, het die voorval ten sterkste veroordeel. 

“Dié soort wetteloosheid, wat al tot die dood van onskuldige mense gelei het, kan nie geduld word nie,” het sy gesê.