Divan Groenewald sal in Oktober in die bokskryt teen groot name in die bokswêreld te staan kom. Dit nadat hy só ’n groot indruk op Impact Boxing Fitness in Vanderbijlpark gemaak het, dat hulle eersdaags na dié dapper jongman van Parys sal uitreik met ’n Box & Dine geleentheid op 6 Oktober.
Groot name in bokskringe sal die geleentheid bywoon, waaronder die Suid Afrikaanse trots, Hekkie Budler, wat tans die wêreldkampioen in sy gewigsklas is. Hekkie het onlangs die IBF World Light Flyweight-titel, die WBA Super World Light Flyweight-titel, en die Ring Magazine Belt-titel ingepalm.
Met die oog op die ontmoeting het Divan baie hard saam met afriger Soon Botes van IBF geoefen, en Hekkie uitgedaag vir ’n drie rondte boksgeveg vir die spesiale “Superhero”-titel wat die aand op die spel is.
Soon homself is baie bekend in die bokswêreld en het al Suid-Afrika by die Olimpiese spele verteenwoordig. Voor sy uittrede was hy agtste in die wêreld in sy gewigsklas.
Hierdie man met sy groot hart trap diep spore in die lewens van baie en die naam Impact staan juis vir die impak wat jy maak in mense se lewens. So bied hulle ook spesiale klasse aan vir mense met Parkinsons, ADHD, en selfs rolstoel boksers.
Om deel te wees van die Box & Dine geleentheid, kan Soon Botes by 072 124 3588, of Theo Botes by 079 785 7343 geskakel word. Kaartjies kos R150 per persoon en daar is ook geleentheid vir maatskappye om tafels te borg. Daar gaan die aand spesiale boks memorabilia op veiling wees en hope vermaak met ‘n paar gevegte.

Die fondse wat die aand met die Boks & Dine geleentheid ingesamel word, sal help om vir Divan ’n nuwe rolstoel te koop wat hy nou nodig het, asook sy geweldige hoë mediese onkostes, met ’n moontlike heupvervanging wat weer in die nabye toekoms vir hom voorlê.
Die 19-jarige Divan ly aan ’n baie rare siektetoestand wat in so min as 70 gevalle wêreldwyd aangemeld is. Mohr Tranebjearg-sindroom is ’n degenaratiewe siekte wat op die ouderdom van drie jaar by Divan gediagnoseer is. Op die ouderdom van ’n jaar het Divan begin bril dra, en vandat hy drie jaar oud is, moes hy ook staatmaak op ’n gehoorapparaat.
Mettertyd kon Divan nie meer sonder hulp loop nie, en kom hy met ’n rolstoel oor die weg. In 2016 moes hy ’n rugoperasie ondergaan om skade te herstel as gevolg van skoliose en kifose wat die funksionering van sy longe, hart en niere nadelig geraak het. Daarna het sy eerste heupvervanging gevolg.
Ten spyte van sy gesondheidsuitdagings is Divan se glimlag sy grootste getuienis van die positiewe gesindheid waarmee hy elke dag aanpak.