“He was a man amongst men. Een van die bestes wat ek ooit geken het.” So het Jumbo Willemse, Feeder wêreldhengelkampioen van 2013 gesê in sy huldeblyk aan Steve Venter wat op Donderdag 6 Augustus in die ouderdom van 75 jaar oorlede is. Steve het op 14 Julie in die Wilgers-hospitaal in Pretoria ‘n rugoperasie ondergaan en het sedertdien ‘n pad met sy gesondheid geloop met komplikasies. Hy is in die Wilgers-hospitaal oorlede. As Parysenaar vir meer as 20 jaar was hy bekend en geliefd onder baie – nie net as sakeman nie, maar ook as sportman en vriend. Sy onderneming, Steve Venter Finansiële, het hy aanvanklik vanuit sy huis in Caroblaan bedryf, en toe later ‘n kantoor in die dorp geopen. Hy het nog tot voor sy operasie gewerk en was sy uitkyk op die lewe om niks ooit half te doen nie. Hierdie sienswyse het hy geleef ook in sy sport waar hy een van min hengelaars was wat in alle fasette van hengel sy Sprinbokkleure kon verwerf. Hy het gedurende sy hengelloopbaan onder meer ook in die provinsiekleure van die Vrystaat en Natal gehengel, en SA drie keer by die Wêreld Spele verteenwoordig vir “Feeder” en paalhengel. Sy eerste hengelklub het hy in 1974 in Ladysmith begin. Hy was dwarsdeur sy lewe passievol oor hengel en het alles wat hy uit die sport gekry het ook weer teruggeploeg met sy kennis wat hy met oud en jonk gedeel het – een van die grootste komplimente wat ‘n sportman kan kry. Langs die viswaters was hy wyd bekend en gerespekteer – ‘n legende wat jou elke oomblik van sy trots kon laat beleef in sy vertellinge oor die sport en sy deelname. Maar dit was nie net in hengel wat hy uitgeblink het nie. Steve het ook Springbokkleure in kleiduifskiet en skyfskiet gehad. Die roudiens word Vrydagoggend 14 Augustus om 11:00 vanuit die NG gemeente Parys-Oos gelei deur ds. Ian Jonker. Hy word oorleef deur sy seuns, Steve en Jacques, kleinkinders Chantené, Abigail, Steadon, Jordan en Juandré en sy familie en vriende wat hom sal onthou as iemand wat dit wat hy aangepak het, voluit gedoen het. ‘n Omgeemens wat dit geleef het waarin hy geglo het.
- Ons innige medelye met die familie.
