Die lente is hier en dit is alreeds sonnig daarbuite. Maar verlede Saterdag was dit ‘n ander prentjie met ‘n laaste bietjie winterkoue. As jy toe bietjie laat gelê het, het jy dit gemis, want glo dit of nie, daar was verlede Saterdagoggend kapok op die grasperke. Vra maar vir die 6-jarige Johnicolas Leite wat vroeg uit die vere was om dié ysvlokkies met sy mond te probeer vang.

Hoewel baie van mening is dat sneeu en kapok een en dieselfde ding is, het die Oos-Kapenaars glo ‘n duidelike verskil geïdentifiseer. Sneeu beskryf hulle as klein kristal balletjies wat in ysige weerstoestande sal val, veral wanneer die dagtemperatuur gewoonlik baie laer is. Dit word ook hoofsaaklik in hoogliggende gebiede gesien. Kapok meen die Oos-Kapenaars sal val op redelik windstil dae as die temperatuur nie drasties gedaal het nie, en dit soos veertjies grondwaarts fladder.

Die woord kapok is eintlik ‘n Maleise woord wat verwys na die wit, wollerige vrugpluis van sekere plante.