Die toetslaboratorium op die perseel van die Parys watersuiweringsaanleg wat twee jaar gelede in ‘n brand verwoes is, is oorgebou en sal water wat by die aanleg gesuiwer word, weer hier getoets kan word sodra toerusting geïnstalleer is.

Die brand in Junie 2023 het groot skade aan laboratoriumtoerusting en rekenaars in die laboratorium aangerig nadat vlamme van ‘n veldbrand teenaan die waterwerke, na die laboratorium-gebou versprei het.

Dit is van die vordering wat gesien is tydens ‘n oorsigbesoek aan die suiweringsaanleg deur Ngwathe se munisipale bestuurder dr. F.P Mothamaha, vergesel deur die tegniese direkteur Patricia Morokolo, Ngwathe se bestuurder van waterdienste, Mokete Phele, raadslid Brendan Olivier, en ingenieurs van die kontrakteur by die watersuiweringsaanleg.

Tydens die oorsigbesoek verlede week is gesê aansienlike vordering word binne die volgende drie weke by die aanleg verwag. Die aanleg behoort met die afhandeling van die werk wat tans gedoen word, 15 megaliter water per dag te kan lewer. Tans word 10 megaliter water
per dag gelewer.

Tydens die oorsigbesoek is ook gekyk na vordering met die vervanging van asbes-waterpype met PVC-pype.

Daar is ook gekyk na die Tumahole-woonbuurt se waterkwaliteit wat met die spoel van die netwerk
verbeter kan word.