‘n Verwoestende brand het vroeër vanmiddag in ‘n gebou aan die agterkant op die Anatomic-perseel in Parys se nywerheidsgebied gewoed waar navorsing en ontwikkeling vir produkvervaardiging uit die herwinning van bande, gedoen is as een van One Small Town (OST) se hoeksteenprojekte.

In nog ‘n gedeelte van dieselfde gebou was ‘n aantal motors van John Olivier gestoor.

Dit was met die skryf van die berig onseker wat die oorsaak van die brand was, maar geen misdaad word vermoed nie, is gesê.

Talle omstanders het op die perseel saamgedrom en het vrywilligers gehelp om van die brandbare materiaal uit die gedeelte van die gebou waar die motors gestoor is, te dra.

Digte rook van die rubber wat gebrand het, het in ‘n swart wolk bo die gebou gehang.  Die ander geboue op die perseel waar ook die Anatomic-fabriek is, is nie beskadig nie.

Die Ngwathe Brandweer- en Nooddiens, sekuriteitsmaatskappye, vrywilligers, Prinsloo Recovery, Ngwathe Verkeer en Tumahole SAPD, LGV, sowel as ander rolspelers was onmidellik op die toneel om hulp te verleen.

Die gebou wat gebrand het is aan die agterkant op die Anatomic-perseel in Parys se nywerheidsgebied. 

Die digte swart rook is van ver gesien en het talle omstanders op die perseel saamgedrom.

Foto’s: Danie Venter & Liezl Scheepers