Die 22-jarige bestuurder van die minibus taxi wat gister betrokke was in ‘n botsing in Vanderbijlpark waarin 12 kinders onderweg skool toe gesterf het, is  deur die polisie gearresteer nadat hy uit die hospitaal ontslaan is, en sal binnekort voor die hof verskyn op klagtes van strafbare manslag, asook klagte van nalatige en roekelose bestuur.

Die taxi het net na 07:00 die oggend met ‘n vragmotor op die R553 naby Arcellor Mittal gebots. Die Gautengse Onderwysdepartement het vanoggend die amptelike dodetal op 12 bevestig.

Gauteng premier Panyaza Lesufi sal vanmiddag die media toespreek oor die tragiese ongeluk waartydens meer besonderhede oor die ongeluk na verwagting bekendgemaak sal word, asook die regering se reaksie op die tragedie en bystand aan die families, mede-leerders en die breër skoolgemeenskap wat geraak is. Die families van die oorledens sal ook besoek word.