Vyf vasgetrek wat vrou beroof, geld oorplaas uit skool se banktoepassing
Die mans sal binnekort voor die Viljoenskroonse landdroshof verskyn.
Vyf gewapende mans wat ‘n vrou in haar erf in die Rammulotsi-woonbuurt by Viljoenskroon oorval en toe haar selfoon gebruik het om toegang tot ‘n skool se banktoepassing te kry, sal binnekort voor die Viljoenskroonse landdroshof verskyn. Hulle word aangekla vir gewapende roof.
Polisiewoordvoerder, sersant Josephine Rani, sê ‘n intelligensie-gedrewe operasie het gelei tot die inhegtenisneming van die vyf wat tussen 21 en 41 jaar oud is. Rani sê die arrestasie is gemaak na ‘n voorval op 6 Februarie, toe die mans, van wie een met ‘n vuurwapen gewapen was, die slagoffer se erf in die Vaalrock-afdeling, Rammolutsi, binnegegaan het terwyl sy besig was om op die selfoon te praat.
Hulle het ’n vuurwapen op haar gerig en haar selfoon gesteel. Die verdagtes het ddaarna aarin geslaag om toegang tot die skool se banktoep op haar foon te kry en het hulle ’n onbekende bedrag geld uit die rekening oorgeplaas.
Die sefloon is later op ’n grondpad in die rigting van ’n plaas buite Viljoenskroon weggegooi. Daar is toe vasgestel dat die SIM-kaart van die gesteelde foon in ’n ander selfoon geplaas is, wat gelei het tot die inhegtenisneming van die vyf verdagtes. Die voertuig wat vir die pleeg van die misdaad gebruik is, is ook gekonfiskeer.
