Die haarkapperstoel en al die meubels en inhoud van die manshaarkapper in die houthuis by die Pick ‘n Pay-sentrum in Parys se sakekern, is vanmiddag laat in ‘n brand vernietig. Die brand het na besigheidsure rondom 15:00 ontstaan en was daar niemand in die haarkapper ten tyde van die brand nie.

Walter wat help met die trollies by Pick ‘n Pay, het die vlamme opgemerk en dadelik hulp ontbied waarop sentrumsekuriteitspersoneel en die Ngwathe Brandweer gehelp het om die vlamme te blus. Dit is nie bekend wat die brand veroorsaak het nie.

Die haarkapper is die afgelope 11 jaar in die houthuis gevestig met menige mans en skoolseuns wat oor jare hier hul hare by Hanli se haarkapper kom sny het.

Ten spyte van haar verlies en die hartseer oor wat in die brand vernietig is, is daar ook oneindige dankbaarheid en genade, vertel Hanli. Sy het altyd saans haar haarknippers huis toe geneem, en sal sy dus steeds ‘n diens aan kliënte kan lewer.

Kliënte kan Hanli skakel by 072 135 5556. 

Hanli het ook dankie gesê aan elkeen wat vanmiddag gehelp het om die brand te blus.