Twee vas na inligting oor beplande rooftog
Flink polisie optrede lei tot arrestasie in Parys
Flink optrede van die Fezile Dabi Distrik Trio taakspan het gesorg dat planne vir ‘n gewapende rooftog in Parys Vrydag (2 Februarie) gefnuik is.
Polisiewoordvoerder sers. Josephine Rani het bevestig dat twee verdagtes, 28 en 31 jaar onderskeidelik, Vrydag in Parys se sakekern gearresteer is vir die besit van ongelisensieerde vuurwapens en ammunisie.
Sers. Rani sê die taakmag lede het inligting opgevolg van ‘n wit Volkswagen Polo wat in die rigting van Parys onderweg was, en ‘n moontlike rooftog wat beplan word.
Danksy strategiese patrollies en vinnige optrede is die verdagtes in ‘n winkel in Parys in hegtenis geneem.
Daar is ook beslag gelê op ‘n wit Volkswagen Polo, die ongelisensieerde vuurwapens en ammunisie wat by die verdagtes gekry is.
Die twee verdagtes sal Maandag 4 Februarie voor die landdroshof in Parys verskyn.
