Die jaarlikse Vroue Landbou Unie (VLU) konferensie is op 7 Februarie met die gebruiklike swier aangebied, maar vanjaar was dit die Parys VLU-dames wat gasvroue was vir die spog geleentheid wat deur 95 dames bygewoon is.

Boonop het Parys se dames ook weer gewys dat hul talente nie onder die maatemmer versteek is nie, en het Marietjie le Roux vir die tweede agtervolgende jaar gespog as die dame wat die meeste punte met haar kompetisie-artikels kon inpalm.

Regs is gaskunstenaar, Ray Dylan, wat die oggend opgetree het. 

Die gasspreker was joernalis Johannes de Villiers, wat tans by Huisgenoot werk, en ook die aanbieder is van Die Blydskapnavorser op RSG. Hierbenewens het drie boeke oor blyskap en bewustheid uit sy pen verskyn. Hy is betrokke by die Universiteit van die Vrystaat se Departement vir Frans, en bied werkswinkels en kursusse oor bewustheid (mindfulness) en stilwordtegnieke landwyd aan.

‘n Luisterryke oggend waarop die Parys VLU-dames met reg trots kan wees.