Local newsNews

Nuus in ‘n piering hou kliënte aan die lees

'n Dorp se eie koerant is 'n voorreg wat bitter min dorpe deesdae beskore is.

Sommige bêre dit vir weke nadat die week se nuus gelees is. Ander gebruik hul ou koerante om ‘n venster bllink te vryf, vir ‘n kunsprojek of selfs onder in die budgie-hok.

Maar by Plum Tree word daar vir jare al ‘n vindingryke herwinningsplan gemaak met ou koerante.

Week na week sal jy op elke tafel in dié restaurant die Parys Gazette sien lê vir besoekers om te lees wanneer hulle naweke op die dorp toesak.

Die dorp se eie koerant – ‘n voorreg wat bitter min dorpe deesdae beskore is.

Net voordat die nuwe week se Gazette hier afgegee word, word al die vorige week se koerante op die tafels bymekaar gemaak en haal Gertrude Mbene haar skêr uit.

Sorgvuldig word die sirkelpatroon op die koerantpapier afgetrek en uitgesny om op die pierings onder elke koppie te sit wat vir kliënte bedien word.

Mense is mal hieroor, gesels Sandra Uys, wat met die blink plan vorendag gekom het. Sy sê kliënte lees graag die koerant, en oor die jare het dié vindingryke plan al gesorg vir vele komplimente.

Parys Gazette is immers so ‘n deel van die dorp soos sy breë strate, leivore en winkeltjies soos kleurvolle krale ingeryg langs die dorp se hoofstraat. ‘n Koerant wat oor jare net bly groei het van die dae toe elke berig en advertensie nog met was opgelyn was, en koerantblaaie met die hand gevou en ingevoeg is, tot waar dit vandag deel is van die Caxton-stal en week na week op die rolpers gedruk word.

Related Articles

 
Back to top button