Daar is steeds nood vir klere vir twee personeellede van die Gekombineerde Skool Sarel Cilliers in Koppies. Dit nadat dié personeellede al hul besittings verloor het in ‘n brand by die seunskoshuis.

Die klere wat benodig word is vir ‘n mansgrootte 28/30 sowel as mansgrootte 34, en skoene in ‘n nommer 7. Daar is ook nog tandeborsels en Vaseline vir die seuns nodig. Die skool het intussen genoeg klere en handdoeke vir die seuns gekry danksy Samaritane wat hul harte vir die 30 laerskoolseuns oopgemaak het wat ook al hul besittings in die brand verloor het.

Komberse en kussings is van die Departement van Onderwys gekry, maar geen beddens of matrasse is ontvang nie. Die seuns word nou tydelik in die onderste verdieping van die dogterskoshuis gehuisves. Die vleuel waar die laerskoolseuns in die seunskoshuis gehuisves was, is heeltemal in die brand vernietig.

Die brand het uitgebreek kort nadat die skooldag op 7 Oktober begin het, en was daar geen kinders op die koshuisperseel ten tyde van die brand nie. Boere en buurskole is na die brand geloof vir die hulp wat verleen is om die brand onder beheer te kry.
Mense wat nog kan help met die skenkings wat benodig word, kan dit by die skoolkantoor afgee, of die koshuismatrone, skakel by 083 403 8232.