Die somer het uiteindelik aangebreek wat beteken die eikelaan in Potchefstroom se akkerbome  skitter weer in hul heldergroen prag. Vir Potchefstroom se  kamerkoor, Molen Kórus, wat as die “groen koor” bekend staan, beteken dit konserttyd!

Die jaarlikse Molen Kórus Kamerkoorfees word reeds vir die vyfde keer aangebied en is ʼn instelling op Potchefstromers se konsertkalender.
Hierdie jaar kan die gehoor uitsien na optredes deur drie kamerkore. Molen Kórus, sal hierdie jaar die verhoog deel met die Rheinberger Kamerkoor van Johannesburg onder leiding van Elana Neethling en die Laudem Dei Kamerkoor van Randburg onder leiding van Laura de Waal wat verlede jaar gestig is.

Die Kamerkoorfees beloof om iets vir elke koorliefhebber te bied met ʼn veelsydige program. Elkeen van die kore bring hul unieke klank en repertoire na die verhoog wat verseker dat die gehoor kan uitsien na klassieke koormusiek, romantiese koormusiek en ook meer kontemporêre en ligter werke wat sal betower en die litte laat roer.

Dit is nie elke dag dat mens die geleentheid kry om soveel kore van uitstaande gehalte op een verhoog te sien kry nie en Molen Kórus nooi elke
koorliefhebber uit om hierdie jaar se Kamerkoorfees te kom geniet.

Die konsert vind plaas 9 November om 18:00 by die NG Kerk Potchefstroom-Noord (Dwarsstraat 21). Kaartjies kos R100 per persoon en
R50 vir kinders (3-12jaar). Kaartjies is aanlyn by Quicket sowel as by die deur beskikbaar.

Diegene wat graag by Molen Kórus wil aansluit kan nou reeds ʼn oudisie bespreek. Oudisies vir nuwe lede word op 12 en 13 November in Potchefstroom gehou Meer inligting is op die koor se Instagram-en Facebook-blaaie beskikbaar (@molenkorus), of stuur ʼn e-pos
na molenkorus@gmail.com.