Kom stap saam Saterdag en maak so ‘n verskil vir ander

Empatie is die vermoë om werklik begrip te hê vir iemand anders se situasie en dit wat hulle voel en beleef. Maar empatie kom nie vanself nie. Dit is ‘n vaardigheid wat ons kinders van jongs af kan leer, want wie van ons weet hoe dit werklik voel om in ‘n ander se skoene te staan? Met die Empathy Walk word gepoog om veral ons kinders te leer om ‘n omgeehart vir ander te hê deur ‘n bietjie van jou tyd te gee om die 5km roete saam te stap of te draf en terselfdertyd iets vir iemand anders in nood te beteken. Al wat nodig is om deel te neem is ‘n omgeehart vir ander.

Wat bring jy saam?
Deelname is gratis. Al wat jy moet saambring is enige klere of skoene – oud of nuut waarvoor jy nie meer nut het nie, of nie-bederfbare produkte, skoonmaakmiddels of toiletware.
Alles wat ontvang word op die dag word geskenk aan Vrystaat Versorging in Aksie wat voorsien in die nood van sovele in die gemeenskap van Parys, en hul groot droom om ook ‘n huis van veiligheid in te rig vir verwaarloosde en mishandelde kinders. Die hartseer realiteit is dat meer as dertig kinders alreeds vanjaar deur maatskaplike werkers van Vrystaat Versorging in Aksie uit hul ouerhuise verwyder moes word weens mishandeling of verwaarlosing.

Die roete:
Dieselfde 5km parkrun roete word gevolg wat parkrunners elke Saterdag by die Egweni River Lodge voltooi. Die roete al langs die rivieroewer is besonder mooi. As jy nie kans sien om self te stap of te draf nie, kom loer net in en bring iets saam vir hulle wat minder het, want op hierdie dag wys ons empatie vir ander in wie se skoene jy dalk nog nie geloop het nie.

Wie kan deelneem?
Oud of jonk, fiks of onfiks – hier is geen beperkinge.