Terwyl daar kommer is oor stygende watervlakke van die Vaalrivier met nog reën wat voorspel word, het sommige oewereienaars en mense in laagliggende gebiede stroomaf van die Vaaldam en Bloemhofdam reeds ag geslaan op die Departement van Waterwese en Sanitasie se waarskuwing gister om betyds te onrtuim waar nodig om skade aan eiendom te probeer verhoed weens vrese vir oorstromings.

By die Schoemansdriftbrug in die Vredefort Koepel wat steeds gesluit is vir verkeer met water wat oor die brug stroom, is die Vaalrivier se vloei vandag gemeet teen 1 464 kubieke meter per sekonde.

Bloemhofdam laat van 18:00 vanaand water uit teen 2 000 kubieke meter per sekonde, terwyl water by die Barrage tans teen 1 093 kubieke meter per sekonde uitgelaat word.

Vaaldam was vanoggend 111,11% vol met invloei gemeet teen 1002,25 kubieke meter per sekonde en uitvloei teen 760 kubieke meter per sekonde. Daar is tans vyf sluise oop by Vaaldam.