Die AfriForum-tak in Viljoenskroon het die afgelope maand die area om die Rotariërhuise wat dien as behuising vir bejaardes in Viljoenskroon, skoon en netjies gemaak. Hoewel die Moqhaka Plaaslike Munisipaliteit verantwoordelik is daarvoor om die area netjies te hou, het die tak agtergekom dat dit so oorgroei is dat dit onmoontlik is om te sien wat binne die perseel aangaan.

Omdat dit hoofsaaklik senior burgers is wat daar woon, het die tak ingespring om skoon te maak ter wille van die inwoners se veiligheid en gesondheid.

Die gras is gesny, bossies is verwyder en  die area is ook met onkruidgif behandel om te verhoed dat dit weer so oorgroei raak. Ongeveer 450 vierkante meter is skoongemaak en 67 sakke vullis, gras en takke is weggery.

“Dit is ’n wonderlike inisiatief van die tak om na die belange van kwesbare mense om te sien waar hulle dit nie self kan doen nie en waar die munisipaliteit in gebreke bly om hulle plig uit te voer,” sê Alta Pretorius, AfriForum se distrikskoördineerder vir die Mooirivier.

“ Dit is verblydend om te sien dat inwoners dit raaksien en ook nou self die moeite doen om hulle erwe skoon te maak, sê Attie Barnard, takvoorsitter van AfriForum in Viljoenskroon. EHy het Willie en Lynne Griessel bedank wat die werkers beskikbaar gestel het.