Rand Water sê hy is bewus van die stadige herstel van watervoorsiening in die Midrand-gebied (Johannesburg), Laudium, Attridgeville en omliggende gebiede in Tshwane, asook die Tembisa-gebied in Ekurhuleni. Hoewel daar steeds enkele onderbrekings in Tshwane en Ekurhuleni ervaar word, is dit minimaal in vergelyking met die groter ontwrigting wat Midrand raak, het Rand Water gesê.

Die waternutsmaatskappy het vroeër vandag bevestig sy watervoorsieningstelsels is ten volle herstel na ‘n vroeëre kragonderbreking en sê daar word tans op vol kapasiteit water gepomp. Daar is egter bekommernis oor die aanhoudend hoë waterverbruik deur die stede Johannesburg en Tshwane, aangesien dit groot druk op die algehele watervoorsieningsnetwerk plaas.

Tans produseer Rand Water ongeveer 5 000 miljoen liter water per dag, waarvan 77% deur die drie metro’s in Gauteng (Tshwane, Ekurhuleni en Johannesburg) verbruik word.  As gevolg hiervan rek Rand Water sy bates tot die uiterste om die hoë verbruik te akkommodeer, het die watervoorsiener gesê.

Rand Water sê hy is voortdurend in gesprek met die metro’s om oplossings te vind. Verder is ook gesê die Midrand-gebied het ’n langdurige probleem van hoë waterverbruik wat vererger word deur die groei van beide formele en informele nedersettings. “Hierdie probleem is goed bekend aan Johannesburg Water, en die entiteit het begin met opgraderings aan die Midrand-stelsels om die watervoorsiening in daardie gebied te versterk,” is bevestig.

Volgens Rand Water is die genoemde gebiede tans in ’n herstelproses maar die hoë waterverbruik bly  ’n groot faktor wat die tempo van herstel beïnvloed.