Pogings van die polisie om beslag te lê op onwettige vuurwapens en dwelms,  het vanmiddag beduidende resultate opgelewer met die arrestasie van twee verdagtes in die Phiritona-woonbuurt by Heilbron.

Lede van die Vrystaatse Anti-Kapingstaakspan het op inligting gereageer oor ’n man wat na bewering dwelms vanuit ’n woning in die Marantha-gedeelte van Phiritona verkoop.

Toe die perseel deursoek is, is ’n .38 Special Taurus-rewolwer gekry waar dit versteek was in ’n laaikas in ’n klerekas. Daar is ook beslag gelê op agt vermoedelik gesteelde selfone en ‘n  beduidende hoeveelheid Crystal Meth met ’n geskatte straatwaarde van R100 000 in die woning.

’n 35-Jarige man en ’n 18-jarige vrou is op die toneel in hegtenis geneem. Hulle word aangekla vir die besit van ’n ongelisensieerde vuurwapen en ammunisie, besit van vermoedelik gesteelde eiendom, en handel in dwelms.

Die beskuldigdes sal na verwagting binnekort in die Heilbronse landdroshof verskyn, het sersant Mahlomola Kareli bevestig.