Drie mense het vanoggend gesterf, en verskeie is beseer na ʼn botsing tussen vier voertuie waaronder ook ʼn minibus taxi en vragmotor, op die R57 tussen Heilbron en Petrus Steyn in die Vrystaat.

Nooddienste is om 05:20 na die botsingstoneel ontbied, het Sipho Towa, voorsitter van Road Incident Management (RIMS) in die Vrystaat gesê.

Volgens Towa is drie van die insittendes van die voertuie op die toneel dood verklaar. Ses mense is beseer, van wie vier pasiënte ernstige beserings opgedoen het.

Towa sê die beseerdes is na die.Tokollo hospitaal in Heilbron, en Pelenomi Trauma sentrum in Bloemfontein vervoer.

Mense is weer gewaarsku om te hou by spoedgrense, waaksaam te wees en veilige volgafstande te handhaaf.

Towa het ook namens RIMS sy medelye uitgespreek teenoor die naasbestaandes van die oorledenes.