Staat wil borg in Viljoen-saak teenstaan
Die bedrog is ontdek nadat die Stad Johannesburg 'n oudit van sy vaste bates gedoen en onreëlmatighede opgemerk het.
Die borgaansoek van Peet Viljoen wat tereg staan op altesaam 400 aanklagte van beweerde bedrog ter waarde van R27 miljoen, korrupsie, diefstal, die gebruik van vervalste dokumente en vervalsing, sal eers op 26 Junie aangehoor word. Die staat is van voorneme om sy vrylating op borgtog teen te staan, sê Lumka Mahanjana, streekwoordvoerder vir die Nasionale Vervolgingsgesag in Gauteng.
Die 57-jarige Viljoen het vandag vlugtig in die Gespesialiseerde Handelsmisdaadhof in Pretoria verskyn.
Volgens Mahanjana word beweer dat Viljoen en vyf ander verdagtes, wat nog nie voor die hof verskyn het nie, tussen Januarie en Maart 2010 op bedrieglike wyse 46 eiendomme wat aan die Stad Johannesburg (COJ) behoort het, aan niksvermoedende individue en/of maatskappye verkoop het sonder die kennis van die COJ.
Om die eiendomme oor te dra, het die beskuldigde na bewering dokumente vervals, insluitend koopkontrakte, verkoopooreenkomste en resolusies van die Stad Johannesburg en Joburg Property Company (Edms.) Bpk. volmagte vir die oordrag van eiendomme, beëdigde verklarings en aansoeke ingevolge artikel 68(1) van die regulasies kragtens die Aktewet 47 van 1937. Verder word beweer dat die beskuldigde ’n adjunkregistrateur wat by die Departement van Grondsake in diens was, omgekoop het om die transportaktes van die eiendomme te registreer.
Die bedrog is ontdek nadat die COJ ’n oudit van sy vaste bates gedoen en onreëlmatighede opgemerk het. Die stad het daarna by die Hooggeregshof in Johannesburg aansoek gedoen om die eiendomme terug te kry. Die hof het die aansoek toegestaan en die eiendomme is aan die COJ terugbesorg.
Ná ’n strafregtelike ondersoek deur die polisie is Viljoen in 2010 in hegtenis geneem en het hy in die Gespesialiseerde Handelsmisdaadhof in Pretoria verskyn. Die saak sou egter van voor af voor ’n ander landdros in die hof begin. Kort voordat die saak weer op die hofrol geplaas is, het Viljoen die land in Mei 2025 verlaat. Hy is op 16 Junie 2026 weer in hegtenis geneem by die OR Tambo Internasionale Lughawe nadat hy uit die Verenigde State van Amerika gedeporteer is.
