Herstelwerk aan slaggate by die kruising van Eerstelaan en Van der Hovenstraat word tans gedoen as deel van die Ngwathe Munisipaliteit se Padherstel- en Onderhoudsprogram wat vroeër vanjaar bekendgestel is.

Volgens Moss Mokhohlane, senior instrukteur vir Safeti, sal die kruising tot minstens Woensdag gesluit wees om voldoende tyd toe te laat vir die materiaal wat gebruik word, om goed droog te word.

Daarna sal die span volgens ‘n prioriteitslys ook na ander strate beweeg.

Daar sal ook weer gewerk word aan die kruising by Breë- en Van Collerstraat. Hoewel herstelwerk vroeër hier gedoen is, en ‘n gedeelte van die kruising daarna oopgemaak is om verkeersvloei toe te laat, het swaar voertuie weer skade veroorsaak, en sal dit herstel word het Mokhohlane bevestig.

Met die Operation Fix my Road-program word 60 mense oor ‘n 12 maande periode deur die diensverskaffer, Safeti (South African Foundation For Empowerment, Traininig & Innovation), opgelei om hulle met die nodige vaardighede toe te rus om slaggate te herstel. Die herstelwerk sal in al die Ngwathe dorpe gedoen word met materiaal wat plaaslik vervaardig word.