Die inbrekers wat Sondagnag derduisende se batterye en rugsteun kragopwekkers by Battery Centre in Parys gesteel het, sowel as die onderneming se voertuig, is oënskynlik ervare hande gewees wat hul huiswerk vooraf goed gedoen het.

Willem Viviers, eienaar van die onderneming, vertel dat alles daarop dui dat die inbrekers reeds die Donderdag voor die inbraak al op die dak was, en gepeuter het om dit makliker te maak om toe hul toeslaan, toegang tot die gebou te kon kry.

Die inbraak was Sondagnag om 223:30 en het die inbrekers presies geweet wat hul doen. Die alarm is gedeaktiveer voordat hulle hulself gehelp het aan die voorrad wat toe op die onderneming se bakkie gelaai is en waarmee hulle weg is.

Selfs die sekuriteitskameras se video-opnemer en alarmsender is gevat.

Die bakkie met registrasienommer CTG 311FS sowel as die voorraad was teen die plasing van die berig nog soek. Die bakkie was gemerk, maar is dit moontlik dat die misdadigers dalk reeds die bemarkingsmateriaal verwyder het.

Willem vertel dat hoewel daar al voorheen inbrake was, was dit enkele goed wat gevat is. “Hierdie was die werk van professionele hande.”

“Mens spandeer soveel aan veiligheid. Ek weet nie wat om nog te doen nie,” sê Willem.

“Mens moet wakker wees en bedag op die tekens as iets nie sou reg wees nie,” waarsku hy. Alarmogies wat skiellik sonder rede jou alarm laat afgaan. Minder opsigtelike dinge in jou veiligheidsnetwerk waarmee dalk gepeuter sou word. Wees ook bedag op misdadigers wat onder die dekmantel dat hulle potensiële klliënte is, in jou winkel rondstaan maar duidelik nie daar is om iets te koop nie.

Partykeer is dit die klein dingetjies wat ons miskyk, wat ‘n misdadigers se planne in die wiele kan ry, as jy bedag is daarop.