‘n Ou hondjie, Niki, is met haar eienaar herenig nadat die hondjie Sondag weg geraak het.

Louise Venter sê haar ouma, Maria Dardim, het die Yorkie-kruising Dinsdag by ‘n troeteldieroppasser gelos om by haar dogter te gaan kuier.

“Toe ons Sondag bel om te reël om die hondjie te gaan haal, het die troeteldieroppasser gesê sy het al vroeër Sondagoggend weggeraak. My ouma was baie hartseer. Die hondjie is baie oud en is haar alles.”

Kort nadat kennisgewings op sosiale media geplaas is, het Pieter Holthauzen vir Louise gekontak en gesê haar ouma se hondjie het by hom aangekom. Hy het die hondjie vir hulle gehou.

Maria sê sy is baie bly en haar hart is nou vol.

“My ouma het eintlik net vir Niki oor nadat sy haar huis tydens Covid moes opgee. Die hondjie kom al baie jare saam met haar,” vertel Louise.