Hoewel gevalle van hondsdolheid nie onlangs in Potchefstroom aangemeld is nie, is dit ’n siekte wat baie vinnig kan versprei. Verlede week het die nasionale media berig dat daar ’n uitbraak van hondsdolheid in Gauteng ondervind word.
Volgens Andries Venter, bestuurder van Potchefstroom Animal Welfare Society (Paws), is dit baie belangrik om troeteldiere teen siektes te beskerm. “Ons gee ’n 5 in 1 inenting asook inenting teen hondsdolheid,” sê hy.
Volgens hom is daar tans ’n probleem in Potchefstroom met katgriep. Daarom raai hy mense aan om so gou moontlik die inentings te laat doen.
Paws het verlede week Vrydagmiddag ’n tydelike kliniek in Ikageng opgerig waar diere teen onder meer hondsdolheid ingeënt is.